قصيدة تحكي حال اولاد البلد دي في امريكا

يا حليلكم يا ولاد امريكا
ما شفتوها حبوبة
كان باليل تحجّينا
ولما ننوم تغتينا
كانت رحمة مسكوبة
كنّا نجيها تدّينا
وكان بي ايدا تسقينا
لمّن نروي من روبا
ولما ابوي يهيج فينا
ويشيلا عصاتو جاينا
كان حجّازو حبوبة



ما شفناهو ماكدونالد
ولا اكلناهو هامبيرقر
اكلنا الكسري بالويكي
وياما صلبنا في الحر
وما شفناها تلاجة
التلاجة كانت جر
وشربنا الموية من الزير
وحتي صفاها متعكّر
وكان تعقبا بي دشوة
وتحمد الله متشكّر
وما سمعنا بالسرطان
كفانا الله من الشر


كنّا بنرعي اغنامنا
وكان تطربنا انغامنا
كان دلوكة مشدودة
او كان معاها وتر
او بي رقصة مصحوبة
وفوقا العريس بشّر


ما كان في وال مارت
ولا اخوهو كيمارت

كان هناك دكيكين
صاحبو اسمو ادريس
وكان الناس مساكين
وكانت لاعنة ابليس
وما دايرا غير الزيت
وحب الشاي والسكر



طبعا مافي كوكا كولا
حلاة ابرينا اللحمر
وطبعا مافي اسناك
اسناكنا كان قنقر
او جُرم بي فول
وجيوبًا ملانة تمر


لا تايوتا لا هوندا
التايوتا كانت عر