الجــــالـــــوص

الجالوص

معتوهة .. معتقة .. ومنعتقة

نوافير إنتشاء .. وحشمة وحمار العين

تنقـِّى من القبور السكلبة

ومن بيت بكاك .. زيف المعزين

تضحك كل ما وقعت مصيبة

تمشى على العجين وتلخبطو

ترطن إذا جاها الحنين

يا بت بيوت الهجعة كيف

وغبار شوارعك ماشى وين

زقاق يفتش فى زقاق

كتمة وضلمة .. وإنعتاق

أنا فيكى لامونى المساجين

سكاتك منازل حلال الحرام

سكاتك على حين أهش الحمام

سكاتك عليك لما تصحى المسام

وسكاتك عليهم .. سكوت والسلام

صوتك وكت قطع البحر

قُبـّال مراكب العمدة .. ضهر النيل عـِرِق

والشمس فوق حبل الغيوم شرت جلاليب النعاس

ناشف غرب .. مبلول شرق

والمطرة زى شِفّع العيد .. تدخل غرف كل البيوت

حكمة الجوع الشرح للأرضة كيف تقرا المِرِق

وقبال يقع فوقك سقف .. يتنحنح الجالوص

أمرق على مهلك .. مروق الحنة من ضُفر العروس

وأصعد على مهلك .. صعود البذرة والروح .. والشموس

مبنية مدن الخوف .. من طينة آخر الليل

وأنا فى سقالة الشوف .. قدح البصيرة تقيل

فاتح زريبة الجوف

تمرق تخش الخيل

على كيفا .. كيف معلوف ..ضهر المظنة يشيل

وأنا ظنى ظنيتو .. لا النيل غريق فى النيل

والليل ولا فى بالو ليل

ساكت يغنوا على القمر

واجعنى فى البحر السكات

وسكتنى فى الوجع البحر

يا بِت صباح الطير .. وين البلد ركّت؟

ما عاد هواك يفتح فى الكتمة شباك النزيف

ريف الجسد ــ صدرك ــ سبلوقة اللبن الحريف

داسينى فيكى نَدُر .. والأنبياء فاتوا

وأنبياء بين بين .. قاعدين فى ضل النار

داسينى فيكى نَدُر

وفى غفلة جوا الكفار .. وطارت حمامة الغار

لاقونى ناشف .. ومـُر

ماذنب جلد الطار ..

لو غنوا بيهو شـُتـُر

ما تخافى الله معاك

.. وكل الملايكة .. سـُمـُر

للاستماع اضغط هنا